40. கவிதைனு சொன்னா நம்பணும்...

காதலர் தினத்தை முன்னிட்டு, இந்த ஜி-யின் பாசறையிலிருந்து முத்தான கவிதைகளை உங்களுக்கு வழங்குபவர்கள்.....

வேற யாரு நான்தான்.

நமக்குத்தான் காதலர் தினம் இல்லைனாலும், முகம் தெரிந்த, தெரியாத எண்ணற்ற நண்பர்களுக்காக இந்தக் கவித்தேன் (யாருப்பா அது.. "இத நாங்க சொல்லணும்"னு சவுண்ட் உடுறது... திருநெல்வேலி அல்வாக்கு மட்டும் ஃபேமஸ் இல்ல.. தெரியும்ல... :))))

இந்திய நேரப்படி காதலர் தினம் முடிந்திருந்தாலும், அமெரிக்க நேரப்படி இன்னும் முடிவடையவில்லை என்பதாலும், காதலர்கள் கொண்டாடத்தான் 365 நாட்களையும் இறைவன் படைத்தான் என்ற கருத்துடன்பாட்டாலும் இக்கவிதையை இங்கே நான் படைக்கிறேன்...

நான் கசக்கி எறிந்த
உனக்கான கவிதையை
சிறந்த கவிதையென
விருதுகள் கொடுக்கின்றனர்....

எப்படித் தெரியும்
அவர்களுக்கு???
உனக்கான சிறந்தக் கவிதையை
படைக்க முடியவில்லையே
என்ற என்னுடைய
ஆதங்கத்தை...

முகம்பார்க்கும் கண்ணாடி கூட
உன் முகத்தைதான்
காட்டுகிறது...
கேட்டால்...
'உன் விழியில்தான் கோளாறு'
என்ற நையாண்டி வேறு...

தனிமையின் தனிமையையும்
விரட்டியடிக்கிறது
உன் நினைவுகளின்
கொசுறு மாத்திரமே...
முழுவதும்
வந்தால்???

'நீரில் எழுதிய வரிகள்'
என்ற பழமொழிக்கு
பொருள்மாற்றம் அளித்தது...
உன்னோடு நான்
வரைந்த
மழைத்துளிக் கவிதைகள்...

'பூக்களைப் பறிக்காதீர்'
உன் அன்பு கட்டளையையும்
அத்துமீறினேன்...
உன் கூந்தலைச் சேராமல்
மலர மாட்டேனென்று
அடம்புடிக்கும்
பூக்களுக்காக...

நான்தான் தலைசிறந்த
மொழிப்பெயர்ப்பாளனாம்...
உன் மௌனத்தையும்
மொழிப்பெயர்க்கும்
திறன் கொண்டதால்...
அவர்களுக்கு
காதல் மொழி
தெரியாது போலும்...

சாதல் இல்லாத
காதல் செய்ய
வாழ்த்துக்கள்...

என்னது இது??? கவிதைன்னு சர்டிஃபிகேட் கொடுத்துட்டு சும்மா போனா எப்படி? பக்காத்தால கெடக்குற கல்ல எடுத்து நச்சுன்னு நடுமண்டைல போட்டுத் தாக்கிட்டுப் போங்கப்பூ... இது கூட தெரியாம எப்படித்தான் ப்ளாக் படிக்கிறீங்களோ??